ambassada
rumantscha
turitg

  • Nossa visiun è in center fisic per la cultura e la tradiziun rumantscha, in lieu da scuntrada singular e viv ed ina patria en la diaspora, nua che l'identitad e la cuminanza rumantscha vegnan tgiradas e promovidas. L'ART duai s'etablir sco center per occurrenzas, activitads ed interess en la diaspora.

  • En l'Ambassada pon persunas s'inscuntrar, organisar e festivar ensemen cun la cuminanza. Ella raduna persunas ed organisaziuns cun ils medems interess.

    Per quest intent vulain nus stgaffir in'organisaziun purtadra, en la quala uniuns, gruppaziuns, cuminanzas d'interess, organisaziuns e persunas singulas furman ina rait rumantscha. L'Ambassada vegn furmada grazia a quest grond spectrum eterogen e po vegnir duvrada per in pretsch favuraivel.

    L'Ambassada daventa in forum per il barat in cun l'auter e cun la cuminanza rumantscha. A medem temp promova ella dentant er il barat economic e cultural da products rumantschs e promova ed engrondescha la rait rumantscha.

    Cun ina forza da lavur porscha ella sustegn per organisar singuls projects ed occurrenzas.

  • En nagina autra citad da la Svizra – cun excepziun da Cuira – na vivan uschè bleras persunas d'origin rumantsch sco a Turitg. A medem temp n'è nagin auter lieu en la diaspora uschè simpel da cuntanscher – davent da pliras autras citads entaifer radund in'ura cun il tren – sco Turitg-Oerlikon.

    La Societad cooperativa per lavurs da construcziun Zentralstrasse (BGZ) dat a tschains sias abitaziuns e surfatschas per mastergnanza per in tschains da locaziun sin basa dals custs. Ella è pronta da metter a disposiziun a la populaziun rumantscha localitads entaifer l'abitadi. L'abitadi è cuntanschibel a pe entaifer 10 minutas davent da la staziun Turitg-Oerlikon.

    Sco cundiziun per la locaziun da las localitads stuain nus cumprovar a moda persvadenta a la BGZ enfin la fin dal 2025 che la finanziaziun da l'ART (tschains e gestiun) po vegnir garantida a lunga vista.

  • Cun la BGZ stat a disposiziun a l'ART ina partenaria potenziala ferma ch'è pronta da sustegnair in project visiunar. Perquai ans legrain nus tant pli da la finanziaziun da partenza da l'Uffizi federal da cultura (UFC) per la direcziun dal project ed il fundraising.

    Fin la surdada da las localitads tras la BGZ l'onn 2029 avain nus avunda temp per sviluppar vinavant l'Ambassada ensemen cun differentas gruppas d'interess. En il fratemp pudain nus duvrar las localitads da la firma Schaub Maler AG (Hofackerstrasse 33) a Turitg sco soluziun transitorica per il project da pilot sco era per differentas occurrenzas.

  • Fasa 1: sclerir ils differents basegns

    Sco emprim pass vulain nus analisar ensemen cun vus tgi che ha tge interess e co che las localitads duain e pon vegnir duvradas, per lura pudair elavurar in concept d'utilisaziun, finanziaziun e management. Per quest intent ha lieu gia ils 12 d'avrigl 2025 in CREATON, al qual era ti es cordialmain envid:ada. Gugent supplitgain nus tai da nudar questa data en tia agenda.

    Fasa 2: elavurar in concept da management e finanziaziun

    Sco purtadra da l'ART vegn constituida ina fundaziun d'utilitad publica. La fundaziun vegn a finanziar a lunga vista il tschains e la gestiun da l'ART. Per tschentar l'Ambassada sin ina basa solida a lunga vista duai la fundaziun constituida garantir la finanziaziun per l'Ambassada durant ils emprims 10 onns. Nus stimain la summa necessaria sin radund MCHF 1.5 – MCHF 1.8 (tschains, custs da pajas, renovaziun da las localitads).

    L'organisaziun dal fundraising ha gia cumenzà. Nus vegnin ad infurmar vus a temp.

    Fasa 3: gestiun e svilup da l'Ambassada (a partir dal 2029)

  • L'Ambassada promova la cultura rumantscha e porscha sustegn per planisar e realisar projects ed occurrenzas. Nus ans legrain da mintga moda da participaziun.

    Sche ti vuls ta participar persunalmain al svilup da l'ART, vegns ti il meglier al CREATON. La finamira è da constituir ina gronda organisaziun purtadra dad uschè bleras uniuns, interpresas, gruppaziuns e persunas interessadas rumantschas sco pussaivel (RAIT RUMANTSCHA).

    Ti pos sustegnair nus sin differentas modas. Per exempel pos ti t'engaschar en nossa squadra sco fundrais:ra, design:ra, communicatur:a, etc. u scriver a nus in messadi co che ti concepissas questas localitads u tge che ti spetgassas da las localitads.
    Sa chapescha è era fitg bainvegnì in sustegn finanzial.

  • Las proximas emnas vegnin nus a crear ina pagina-web ed a publitgar là pass per pass infurmaziuns davart l'ART (www.ambassada-rumantscha.ch).